ކައުންސިލްތަކަށް ސިޔާސީ މުވައްޒަފުން އައްޔަން ކުރަމުންދާތީ އެމްޑީޕީން ކަންބޮޑުވުން ފާޅުކޮށްފި އެވެ. އެމްޑީޕީން ކަންބޮޑުވުން ފާޅުކޮށްފައި ވަނީ ބައެއް ކައުންސިލްތަކުން ސީނިއަރ ޕޮލިޓިކަލް ޑިރެކްޓަރުންގެ ގޮތުގައި މަގާމްތަކަށް އައްޔަންކުރި މުވައްޒަފުންނަށް މަރުހަބާގެ ޕޯސްޓްތައް ކައުންސިލްތަކުން ޢާއްމުކުރަމުންދަނިކޮށެވެ.solex

އެމްޑީޕީގެ ބަޔާނުގައި ބުނެފައިވަނީ އަތޮޅު ކައުންސިލުތަކާއި ރަށު ކައުންސިލްތަކަކީ އަމިއްލަ ނަމުގައި ދަޢުވާކުރުމާއި ދަޢުވާ ލިބިގަތުމުގެ ބާރު ލިބިފައިވާ ވަކި ޤާނޫނީ ޝަޚްޞެއްކަން ދިވެހިރާއްޖޭގެ އިދާރީ ދާއިރާތަށް ލާމަރުކަޒީ އުޞޫލުން ހިންމުގެ ޤާނޫނުގައި ކަނޑައެޅިގެން ބަޔާންކޮށްފައި ވަނިކޮށް, އެ ކައުންސިލުތަކަށް ސިޔާސީ މުވައްޒަފުން އައްޔަނުކުރަމުންދަނީ ކަނޑައެޅިގެން ކައުންސިލުތަކުގެ ބާރު ކަނޑުވާލަން ކަމަށެވެ. ލާމަރުކަޒީ ޤާނޫނުގެ ދަށުން އުފައްދާފައިވާ ކައުންސިލް އިދާރާތަކަށް ސިޔާސީ މުވައްޒަފުން އައްޔަނުކުރުމުގެ ބާރު ރައީސް ޑރ.މުއިއްޒަށް ލިބިވަޑައިނުގަންނަވާތީ، ކައުންސިލް އިދާރާތަކަށް ސިޔާސީ މުވައްޒަފުން އައްޔަނުކުރުން ހުއްޓާލަން އެމްޑީޕީން ވަނީ ގޮވާލާފައެވެ.

މީގެއިތުރުން ލާމަރުކަޒީ ނިޒާމަށް ހުރަސް އަޅަން މިހާރު ހިނގަމުންދާ ރައްޔިތުންގެ މަޖިލިހުން ޤާނޫނުތައް ފާސްކުރަމުންދާ ކަމަށާއި, އެކަމާވެސް ކަންބޮޑުވާކަމަށް މިއަދު އާއްމުކުރި ބަޔާނުގައި ބުނެފައި ވެއެވެ. އެމްޑީޕީގެ ބަޔާނުގައި ފާހަގަކޮށްފައިވާ އެއް ބިލަކީ މިދިޔަ ބުރާސްފަތި ދުވަހު ރައްޔިތުންގެ މަޖިލިހުން ފާސްކުރި ބިނާވެށި ޕްލޭންކުރުމާ ހިންގުމުގެ ބިލެވެ.