އުމްރާއަށް މީހުން ގެންދިއުމުގެ އުޞޫލާ ޚިލާފުވި 19 ކުންފުންޏެއް ޖޫރިމަނާ ކުރަން އިސްލާމިކް މިނިސްޓްރީން ނިންމައިފި އެވެ.solex

އިސްލާމިކް މިނިސްޓަރ ޑރ.މުޙައްމަދު ޝަހީމް އަލީ ސައީދު މިއަދު ވިދާޅުވީ އެކުންފުނިތަކުން އުޞޫލާ ހިލާފްވި ކަންކަމުގެ ކުޑަބޮޑު މިނަށް ބަލައި 5 ހާސް ރުފިޔާއިން ޖޫރިމަނާކުރުމަށް ނިންމާފައިވާ ކަމަށެވެ. މީގެއިތުރުން އުމްރާއަށް މީހުން ގެންދިއުމަށް މިނިސްޓްރީން ދީފައިވާ ރަސްމީ ލައިސަންގެ ދައްކައިގެން އުމްރާއަށް ފުރަން ކަމަށް ހަދައި އެމްއެމްއޭ އިން ޑޮަލަރު ނަގައި، އުމްރާއަށް ނުދިޔަ ކުންފުންޏެއް ފާހަގަ ކުރެވިފައިވާކަމަށް ވަޒީރު ވިދާޅުވިއެވެ. އެކަން އިތުރަށް ބަލައި މިނިސްޓްރީއަށް އެކަން ސާބިތު ވެއްޖެ ނަމަ އެކުންފުނި 30 ހާސް ރުފިޔާއިން ޖޫރިމަނާކޮށް ހުއްދަ ހިފަހައްޓާނެ ކަމަށް ވަޒީރު ވިދާޅުވިއެވެ. އަދި އެ މައްސަލަ ތަޙްޤީޤުކުރަން ޕޮލިހަށް ފޮނުއްވާނެ ކަމަށް ވިދާޅުވިއެވެ.

ޑޮލަރު ދޫކުރާނީ ފުރުމުގެ ޓިކެޓާއި ޑޮކިއުމެންޓްސް ހުށަހެޅުމުންނެވެ. އެހެންކަމުން އެކުންފުނިން ޑޮލަރު ނެގީ ފޭކު ޑޮކިއުމެންޓް ހުށަހަޅައިގެންކަމަށް މިނިސްޓްރީން ތުހުމަތުކުރެއެވެ. އުމްރާއަށް މީހުން ގެންދިއުމުގައި އަމަލުކުރާން ގެޒެޓް ކޮށްފައިވާ އުޞޫލަށް އަމަލު ނުކުރާ ހުރިހައި ކުންފުނިތަކަށް ފިޔަވަޅު އަޅާނެކަމުގެ ޔަގީންކަންވެސް މިނިސްޓަރ ޝަހީމް ދެއްވިއެވެ.

އުމްރާއަށް މީހުން ގެންދިއުމުގެ އުޞޫލާ ހިލާފްވި މައްސަލަތައް މިފަހަރު ބޮޑަށް ފެންމަތިވީ ޑިސެމްބަރު މަހު އަލް-ހިޖުރަ ޓްރެވަލް އެންޑް ޓުއަރސް އިން އުމްރާއަށް ގެންދިޔަ ބަޔަކު މާލެ ނުގެނެސް ހާލުގައި ޖެއްސި މައްސަލައާ ހިސާބުންނެވެ.