ށ. މިލަންދޫއަށް މަސްތުވާތަކެތި އެތެރެކުރަން އުޅުނު ދެ މީހަކު ހައްޔަރުކޮށްފިއެވެ.

އެމައްސަލައިގައި ހައްޔަރުކުރީ ހދ. ކުޅުދުއްފުށި / ދުނބުމާ، އަޙްމަދު ޟަމީރު (37އ) އާއި ހދ. ކުޅުދުއްފުށި / ހުވަފެނީއައްސޭރި، އަޙްމަދު އިސްމާޢީލް (31އ) އެވެ. އެދެމީހުން ހައްޔަރުކުރީ ކުޅުދުއްފުށި ސިޓީން ފުރައިގެން ޑިންގީއެއްގައި ދަތުރުކުރަމުންދާ ބަޔަކު ށ. މިލަންދޫއަށް މަސްތުވާތަކެތި އެތެރެކުރަން އުޅޭކަމަށް ފުލުހުންނަށް ލިބުނު މައުލޫމާތަކާ ގުޅިގެން ހިންގި މި އޮޕަރޭޝަނެއްގައި ކަމަށް ފުލުހުން ބުންޏެވެ.

މިދިޔަ ބުދަ ދުވަހު މިލަންދޫ ޕޮލިސް ސްޓޭޝަނާއި އިންޓެލިޖެންސް ގުޅިގެން ހިންގި މި އޮޕަރޭޝަނުގައި އެމީހުން ހައްޔަރުކުރީ މިލަންދޫން ބަނދަރުމަތިންނެވެ. އެ މީހުން ހައްޔަރުކޮށް ބަލައިފާސްކުރިއިރު މަސްތުވާތަކެތި ކަމަށް ބެލެވޭ އެއްޗެއްހުރި 146 ރަބަރު ޕެކެޓު ފެނިފައިވާ ކަމަށް ފުލުހުން ބުންޏެވެ.

މި މައްސަލައާ ގުޅިގެން އެދެމީހުންގެ ބަންދާމެދު ގޮތެއް ނިންމުމަށް ކޯޓަށް ގެންދިއުމުން ދެ މީހުން ވެސް 15 ދުވަހަށް ބަންދުކުރުމަށް ކޯޓުން ވަނީ އަމުރުކޮށްފައެވެ.

މައްސަލަ މިލަންދޫ ޕޮލިސް ސްޓޭޝަނުން ތަހުގީގު ކުރަމުންދާކަމަށް ފުލުހުން ބުންޏެވެ.

Milandhoo ah masthuvaa thakethi etherekuran ulhunu 2 meehaku hayyaru kohfi

މިލަންދޫއަށް މަސްތުވާތަކެތި އެތެރެކުރަން އުޅުނު ދެ މީހަކު ހައްޔަރުކޮށްފި

ފްލެޓް ލިސްޓާ ގުޅިގެން ޝަކުވާ ހުށަހަޅާއިރު އިތުރު ލިޔުން ހުށަހަޅަން ފުރުޞަތު ނުދެވެނީ އިތުރަށް ޗެކް ކުރަން ކުރެވުނު މަސައްކަތަށްވާތީ ކަމަށް ގެދޮރުވެރިކަމާ ބެހޭ ވުޒާރާއިން ބުނެފިއެވެ. 

އެޒުވާޒާއިން މިއަދު ނެރުނު ނޫސްބަޔާނެއްގައި ބުނީ އިތުރު ލިޔުންތައް ހުށަހަޅަން ފުރުޞަތު ނުދެވެނީ މިއީ އިވެލުއޭޝަނަށްފަހު ނެރެވުނު ވަގުތީ ލިސްޓާއި ގުޅިގެން ހުޅުވާލެވުނު ޝަކުވާ ހުށަހެޅުމުގެ މުއްދަތުގައި ލިޔުން ހުށަހެޅުމަށް ފުރުޞަތު ދެވި ފައިނަލް ކުރެވިގެން ނެރެފައިވާ ލިސްޓެއް އިތުރަށް ޗެކް ކުރަން ކުރެވުނު މަސައްކަތަކަށްވާތީ ކަމަށެވެ.

މިނިސްޓްރީން ބުނީ ވެރިފިކޭޝަނަށް ފަހު ނެރެފައިވާ ލިސްޓަށް ޝަކުވާ ހުށަހެޅުމަށް ދެވިފައިވާ ފުރުޞަތަކީ ވެރިފިކޭޝަންގައި މިނިސްޓްރީން އެޕްލިކޭޝަން ފޯމެއްގައި ހުރި މަޢުލޫމާތާއި ހުށަހަޅާފައިވާ ލިޔުންތައް ބެލުމުގައި ގޯސްކޮށް ކަމެއް ކުރެވިފައިވާނަމަ އެކަން ރަނގަޅު ކުރުމަށް ދެވިފައިވާ ފުރުޞަތެއް ކަމަށެވެ. އަދި މި 4000 ފްލެޓް ލިބުމުގެ ފުރުޞަތު ނުލިބޭ ފަރާތްތައް އަލުން ބޯހިޔާވަހިކަމަށް ހުށަހެޅުމުގެ ތަކުލީފު ތަހަންމަލު ކުރަން ނުޖެހޭނެކަމަށާއި، ބޯހިޔާވަހިކަމާއި ގެދޮރުވެރިކަމަށް ބޭނުންޖެހިފައިވާ ކޮންމެ ދިވެހި ރައްޔިތަކަށް އެ ފުރުޞަތު ކަށަވަރުކޮށްދިނުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވެވަޑައިގެންފައިވާ ވަޢުދުގެ ދަށުން، އެ ފަރާތްތަކަށްވެސް މި ދައުރުގައި ބޯހިޔާވަހިކަމުގެ ފުރުޞަތު ލިބިގެންދާނެކަމުގެ ކަށަވަރުކަން މިނިސޓްރީން ވަނީ ދީފައެވެ.

ނޫސްބަޔާނުގައި ބުނެފައިވަނީ އެއްވެސް ފަރާތަކަށް ލިބިފައިވާ ޕޮއިންޓަށް ބަދަލު އައިސްފައިވާނަމަ އައިސްފައިވާނީ ފޯމުލީ ފަރާތުން ދީފައިވާ މަޢުލޫމާތާއި ޚިލާފަށް ޕޮއިންޓް ދީފައިވާނަމަ ކަމަށެވެ. އެކަން ފޯމު ލީ ފަރާތްތަކަށް ޕޯޓަލްއިން އެނގެން ހުންނާނެ ކަމަށްވެސް މިނިސްޓްރީގެ ބަޔާނުގައި ބުނެފައިވެއެވެ.  

މިނިސްޓްރީގެ ބަޔާނުގައި ބުނީ ސައްހަކަން ކަށަވަރުކޮށް ނެރުނު ލިސްޓާ ގުޅިގެން އެމްޑީޕީން ނޫސްވެރިންގެ ބައްދަލުވެއް ބާއްވާ ދެއްކި ވާހަކަތަކަކީ ރައްޔިތުންނަށް ހަގީގަތް އޮޅުވާލުމަށް ދެއްކި ވާހަކަތަކެއް ކަމަށެވެ.

Ithuru liyun husha alhan furusath nudheveny ithurah check kuran kurevunu masahkkathakah vaathy- Ministry

 އިތުރު ލިޔުން ހުށަހަޅަން ފުރުޞަތު ނުދެވެނީ އިތުރަށް ޗެކް ކުރަން ކުރެވުނު މަސައްކަތަށްވާތީ- މިނިސްޓްރީ

ޕީޕަލްސް ނެޝަނަލް ކޮންގްރެސް (ޕީއެންސީ) އިން ރައީސް ޑރ.މުޙައްމަދު މުއިއްޒު ދިފާއުކޮށް, ސްޕްރީމް ކޯޓްގެ ފަނޑިޔާރުކަމުން އިސްތިއުފާދެއްވި ހުސްނުއް ސުޢޫދަށް ފާޑުކިޔައިފިއެވެ.

ރައީސުލްޖުމްހޫރިއްޔާ ޝަރުއީ ދާއިރާއަށް ނުފޫޒު ފޯރުއްވާ, ވަކިގޮތަކަށް ހުކުމް ނެރުމަށް ފަނޑިޔާރުންނަށް ބިރުދައްކަވާ ކަމަށް ވިދާޅުވެ އިސްތިއުފާދެއްވި ހުސްނުއް ސުޢޫދު ޕީއެންސީން ސިފަކުރެއްވީ އެކްޓިވިސްޓެއްގެ ގޮތުގައެވެ.

ޕީއެންސީން ބުނީ ފަނޑިޔާރުކަމުގެ މަގާމްގައިވެސް އަދި މަޤާމުން ވަކިވެވަޑައިގަތުމުގައިވެސް ފަނޑިޔާރުން ސިޔާސީ ވިސްނުމާއި އެކްޓިވިޒަމްގެ އުޞޫލު އިސްކުރުމަކީ ޤާނޫނީ ނިޒާމް ދަންނަ ކަމެއް ނޫން ކަމަށެވެ. ހުސްނުޢް ސުޢޫދު އިސްތިއުފާ ދެއްވުމުގައި ޢަމަލުކުރެއްވި ގޮތުން ފަނޑިޔާރު  ސުޢޫދު ދިވެހިރާއްޖޭގެ އެންމެ މަތީ ކޯޓްގެ ފަނޑިޔާރު ކަމުގައިވެސް ގެންގުޅުއްވީ އެމަޤާމަށް ވަޑައިގަތުމުގެ ކުރިންވެސް ގެންގުޅުއްވި ސިޔާސީ އެކްޓިވިޒަމްގެ އުޞޫލުކަން ސާފްވެއްޖެ ކަމަށް ޕީއެންސީގެ ބަޔާނުނުގައި ބުނެފައި ވެއެވެ.

ރައީސުލްޖުމްހޫރިއްޔާ ދިފާއުކުރައްވާ ޕީއެންސީން ބުނީ ރައީސް ޑރ.މުޙައްމަދު މުއިއްޒު ވަނީ މިނިވަން މުއައްސަސާތައް މުސްތަޤިއްލުކަމާއެކު ޤާނޫނީ ޒިންމާ އަދާކުރުމުގެ ފުރުޞަތު ދީފައި ކަމަށެވެ. 

އެފަދަ މުއައްސަސާ އަކުން އަދާކުރަންޖެހޭ ޤާނޫނީ ޒިންމާއެއް އަދާކުރުމަކީ ޝަރުޢީ ދާއިރާއަށް ނުފޫޒު ފޯރުވުން ނޫން ކަމަށާއި, އެއީ ދުސްތޫރީ ޤާނޫނީ ނިޒާމު ހިނގަންޖެހޭ ގޮތަށް ރަނގަޅަށް ހިނގަމުން ދިއުންކަމަށް ޕީއެންސީގެ ބަޔާނުގައި ވެއެވެ. 

ޕީއެންސީން ވަނީ ދިވެހިރާއްޖޭގެ ޤާނޫނު އަސާސީ އާއި ޤާނޫނުތައް ނެގެހެއްޓުމުގައި އަދި މިނިޒާމް ހިނގަންޖެހޭ ގޮތަށް ހިނގަމުންދާކަން ކަށަވަރުކުރެއްވުމުގައި ރައީސުލްޖުމްހޫރިއްޔާ ދައްކަވަމުންދާ ނަމޫނާ ފާހަގަކުރައްވާ ޝުކުރުވެސް އަދާކުރައްވާފައެވެ.

ޕީއެންސީން މިފަދަ ބަޔާނެއް ނެރެފައި މިވަނީ ސްޕްރީމް ކޯޓްގެ ތިން ފަނޑިޔާރުން ސަސްޕެންޑްކޮށް, ތިން ފަނޑުޔާރުންގެ މައްސަލަތައް ޖޭއެސްސީން ބަލަމުން ދަނިކޮށެވެ. އޭގެތެރެއިން އެއް ފަނޑިޔާރަކީ އިސްތިއުފާދެއްވި ހުސްނުއް ސުޢޫދެވެ.

PNC in Muizzu dhifaaukoh, Husnuh Soodh ah faadukiyaifi

  ޕީއެންސީން މުއިއްޒު ދިފާއުކޮށް, ހުސްނުއް ސުޢޫދަށް ފާޑުކިއުން

ފަނޑިޔާރުގެ މިނިވަން ކުރުމަށް ކުރެވެންހުރި ހުރިހާކަމެއް ކުރުމަށް ދައުލަތުގެ އިދާރާތަކަށް އިދިކޮޅު އެމްޑީޕީން ގޮވާލައިފި އެވެ. އެޕާޓީން މިކަމަށް ގޮވާލީ ސަރުކާރުން ސްޕްރީމް ކޯޓް ފަނޑިޔާރުންނަށް ބިރުދައްކާ, ވަކިގޮތަކަށް މައްސަލަ ނިންމަން މަސައްކަތްކުރާ ކަމަށް ތުހުމަތުކުރައްވާ އެކޯޓްގެ ފަނޑިޔާރުކަމުން ހުސްނުއް ސުޢޫދު އިސްތިއުފާދެއްވި ދެއްވުމަށް އިޝާރާތް ކުރަވައެވެ. 

އެމްޑީޕީން މިއަދު ނެރުނު ބަޔާނުގައި ބުނެފައިވަނީ ދުސްތޫރީ މައްސަލަ ސްޕްރީމް ކޯޓަށް ބެލޭނެ ކަމަށް ކަނޑައަޅާ, ބަލަން ފެށުމާ ގުޅިގެން ޖޭއެސްސީއާ އޭސީސީ މެދުވެރިކޮށް ފަނޑިޔާރުންގެ މައްސަލަ ބަލަނީ އަސާސެއް ނެތި ކޯޓްގައި އޮތް މައްސަލަ ސަރުކާރުން ބޭނުންވާ ގޮތަށް ނިންމުވަން ނުފޫޒު ފޯރުވުމުގެ ގޮތުން ކަމަށެވެ. އެކަމާ ނުހަނު ކަންބޮޑުވާކަމަށް އެމްޑީޕީގެ ބަޔާނުގައި ބުނެފައި ވެއެވެ.

އެމްޑީޕީން ބުނީ އާރާއި ބާރު މިއަދު އޮތުމުން އެމައްސަލަ ނުބެލޭނެ ކަމުގެ ޔަގީންކަން ރައީސް މުއިއްޒު އަށް މިއަދު އޮތަސް, މުޅި ރާއްޖޭގެ ދުސްތޫރީ ނިޒާމް ފުނޑުފުނޑު ކޮށްލުމަށް ރައީސް ޑރ.މުއިއްޒު އިސްވެ ހުންނަވާ ދެމުންދާ ހަމަލާތައް ތަހުގީގުކޮށް, ހަރުކަށި އަދަބު ދިވެހިރައްޔިތުން ދޭނެކަން ހަނދުމަފުޅުކޮށް އަރުވާ ކަމަށެވެ.

Fandiyaaruge minivan kurumah kureven huri huriha kameh kurumah MDP in govaalaifi

ފަނޑިޔާރުގެ މިނިވަން ކުރުމަށް ކުރެވެންހުރި ހުރިހާކަމެއް ކުރުމަށް އެމްޑީޕީން ގޮވާލައިފި

ރައީސުލްޖުމްހޫރިއްޔާ ޖުޑިޝަރީއަށް ނުފޫޒު ފޯރުވާކަމަށް ވިދާޅުވެ ހުސްނުއްސުޢޫދު ސްޕްރީމް ކޯޓްގެ ފަނޑިޔާރުކަމުން އިސްތިއުފާ ދެއްވައިފިއެވެ. އިސްތިއުފާ ދެއްވި އިރު ހުންނެވީ ޖުޑިޝަލް ސަރވިސް ކޮމިޝަނުން ސަސްޕެންޑް ކުރައްވާފައެވެ. އިތުރު ދެ ފަނޑިޔާރަކާއެކު ސަސްޕެންޑްކުރެއްވީ ނުފޫޒު ފޯރުއްވަން ކަމަށް ހުސްނުއްސުޢޫދު އިސްތިއުފާގެ ސިޓީގައި ވަނީ ވިދާޅުވެފައެވެ.

އިސްތިއުފާދެއްވި ސަބަބެއްކަމަށް ފޮނުއްވި ސިޓީގައި ވިދާޅުވެފައިވަނީ ދިވެހިރާއްޖޭގެ ޤާނޫނު އަސާސީއާ ހިލާފަށް އަދުލްއިންސާފްގެ ބާރަށް ނުފޫޒު ފޯރުވާ, ސްޕްރީމް ކޯޓަށް ހުށަހަޅާފައިވާ މައްސަލަ ބެލުން ހުއްޓުވުމުގެ ގޮތުން ސްޕްރީމް ކޯޓްގެ 3 ފަނޑިޔާރުން ސަސްޕެންޑް ކުރުމެވެ.

ސްޕްރީމް ކޯޓްގެ ފަނޑިޔާރުންގެ އަދަދު މަދުކުރުމަށް ރައްޔިތުންގެ މަޖިލިހުން ފާސްކޮށް, ސްޕްރީމް ކޯޓްގެ ފަނޑިޔާރުންނަށް ބިރު ދައްކާ ސްޕްރީމް ކޯޓަށް ހުށަހެޅިފައި އޮތް މައްސަލަ ރައީސުލްޖުމްހޫރިއްޔާ އެދޭގޮތަށް ނިންމެވުމަށް ނުފޫޒު ފޯރުވުމަކީވެސް އިސްތިއުފާ ދެއްވި ސަބަބެއް ކަމަށް ވިދާޅުވެފައިވެއެވެ. ސަސްޕެންޑް ކުރެއްވީ ސްޕްރީމް ކޯޓްގެ ފަނޑިޔާރުން އަދަދު މަދުކުރުމުގެ ބިލް ރައްޔިތުންގެ މަޖިލިހުން ފާސްކުރެއްވި ދުވަހު އެވެ. އަދި ޕާޓީން ވަކިވެއްޖެ ނަމަ ނުވަތަ ވަކިކޮށްފިނަމަ މަޖިލިހުގެ މެމްބަރުކަން ގެއްލޭ ގޮތަށް ޤާނޫނު އަސާސީއަށް ގެނައި ބަދަލުގެ މައްސަލަ ސްޕްރީމް ކޯޓަށް ބެލޭނެ ކަމަށް ނިންމަވާ, އެމައްސަލަ ބައްލަވަމުން ގެންދަވަނިކޮށެވެ. އެމައްސަލަ ބައްލަވަމުން ގެންދެވީ 7 ފަނޑިޔާރުން ހިމެނޭ ސްޕްރީމް ކޯޓްގެ ފުލް ބެންޗުންނެވެ.

 ޖޭއެސްސީން ބުނީ ހުސްނުއްސުޢޫދާއި އިތުރު ދެ ފަނޑިޔާރުން ސަސްޕެންޑްކުރެއްވީ ބަލަމުންދާ މައްސަލަތަކާ ގުޅިގެން ކަމަށެވެ. އެފަނޑިޔާރުންގެ މައްސަލަތަކެއް ބަލަމުންދާކަން އޭސީސީން އެންގުމުން ކަމަށް ޖޭއެސީން ވިދާޅުވިއެވެ. ފަހުން އޭސީސީން ވެސް ވަނީ އެފަނޑިޔާރުންގެ މައްސަލަތަކެއް ބަލަމުންދާކަމަށް ވިދާޅުވެފައެވެ. އެކަމަކު މައްސަލަތަކުގެ ތަފްސީލެއް ނުދެއެވެ. 

ސުއޫދު ސިޓީ ނިންމަވާލައްވަމުން ވިދާޅުވެފައިވަނީ އިސްތިއުފާ ދެއްވީ އިހުތިޖާޖު ކުރެއްވުމުގެ ގޮތުން ކަމަށެވެ.

Raeesuljumhooriyya Judiciary ah nufooz foaruvaa kamah vidhaalhuve, Husnuhsoodh isthiufaa dhevvaifi

ރައީސުލްޖުމްހޫރިއްޔާ ޖުޑިޝަރީއަށް ނުފޫޒު ފޯރުވާކަމަށް ވިދާޅުވެ ހުސްނުއްސުޢޫދު އިސްތިއުފާ ދެއްވައިފި

ޢިއްޒުއްދީން ފާލަން އަލުން ތަރައްޤީކޮށް ހުޅުވައިފިއެވެ. ފާލަން ހުޅުއްވައިދެއްވީ ރައީސުކްޖުމްހޫރިއްޔާ ޑރ.މުހައްމަދު މުއިއްޒުއެވެ.

ފާލަން ހުޅުއްވައިދެއްވުނަށްފަހު ރައީސުލްޖުމްހޫރިއްޔާ ވިދާޅުވީ ޢިއްޒުއްދީން ފާލަން ރަމްޒުކޮށްދެނީ، ދިވެހިވަންތަކަމާއި، ދިވެހި ފަންނުވެރިކަމާއި، ދިވެހި މާޒީ އާއި މުސްތަޤުބަލުކަމަށެވެ. އެމަނިިިފާނު ވިދާޅުވީ އިއްޒުއްދީން ފާލަމަކީ، ޤައުމިއްޔަތު ދިރުވައި އާލާކުރުމުގެ ފިކުރު ބިނާކުރުން ހިމެނޭ ގޮތަށް، މި ސަރުކާރުގެ ޤައުމީ ތަރައްޤީގެ ސިޔާސަތާ ގުޅިލާމެހޭ ގޮތަށް ފަރުމާކޮށްފައިވާ ފާލަމެއް ކަމަށެވެ.  ފާލަން ފަރުމާކުރުމުގައި ދިވެހި ޘަޤާފަތާއި، ދިވެހީންގެ އަމިއްލަވަންތަކަން ދައްކުވައިދިނުމަށް ވަނީ ޚާއްޞަ އިސްކަމެއް ދެއްވާފައެވެ. އެގޮތުން، ފާލަން ފަރުމާކޮށްފައިވަނީ، ދިވެހިރާއްޖޭގެ ފުރަތަމަ ޖުމްހޫރިއްޔާގެ ރައީސް ސުމުއްވުލް އަމީރު މުޙައްމަދު އަމީން ދޮށިމޭނާ ކިލެގެފާނުގެ ވެރިކަމުގައި ބޭނުންކުރެއްވި ރަސްމީ ފާލަމާއި، ދެވަނަ ޖުމްހޫރިއްޔާގެ ދެވަނަ ރައީސް، ނިޝާން ޣާޒީގެ ޢިއްޒަތުގެ ވެރިޔާ އަލްއުސްތާޛް މައުމޫން ޢަބްދުލްޤައްޔޫމްގެ ވެރިކަމުގައި ބޭނުންކުރެއްވި ރަސްމީ ފާލަމުގެ ފަރުމާއަށް ރިޢާޔަތްކޮށްގެންނެވެ. 

ދިވެހިރާއްޖޭގައި އެންމެ ފަހުން ރަސްކަންކުރެއްވި އަލްއަމީރު މުޙައްމަދު ފަރީދު ދީދީގެ ތޮފިކޮޅު ސިފަވާފަދަ ނިޝާނެއްވެސް ފަރުމާގައި ހިމަނާފައިވެއެވެ.    ރައީސުލްޖުމްހޫރިއްޔާ ވަނީ ޖުމްހޫރީ މައިދާނުގެ ފައްވާރާއި، ޢިއްޒުއްދީން ފާލަން އަދި ސަލްޓަން ޕާކު ހިމެނޭ މި ސަރަހައްދަކީ މާލޭގެ ރައްޔިތުންގެ ހިތްހަމަޖެހުމަށް އޮތް އެންމެ ބޮޑު އެއް ސަރަހައްދުކަން ފާހަގަކުރައްވައި، އެ ސަރަޙައްދުގެ ތަރައްޤީއަށް ގެންގުޅުއްވާ ވިސްނުންފުޅުވެސް ހިއްސާކުރައްވާފައެވެ.  އެގޮތުން، ކުރިއަށް އޮތް ހައެއްކަ މަސްދުވަހުގެ ތެރޭގައި ސަލްޓަން ޕާކު އަލުން ތަރައްޤީކުރައްވާނޭކަމުގެ ޚަބަރުވެސް އެމަނިކުފާނު ވަނީ ދެއްވާފައެވެ. 

ސަލްޓަން ޕާކު ތަރައްޤީކުރައްވާނީ، ބަވަނަވަމުންދާ ދުނިޔޭގެ ޒަމާނީ ފަންނިއްޔާތު ބޭނުންކޮށްގެން އަދުގެ ޖީލަށް ޝަޢުޤުވެރިކުރަނިވި ގޮތެއްގައި ރާއްޖޭގެ ތާރީޚު ދަސްވާނޭ ގޮތަކަށް ކަމުގައި އެ މަނިކުފާނު ވިދާޅުވިއެވެ.  މީގެ އިތުރުން އެމް.ޓީ.ސީ.ސީ ފެރީ ޓަރމިނަލުން ފެށިގެން އެމް.އެމް.އޭގެ ޢިމާރާތާ ހަމައަށް މަގު ތަރައްޤީކުރުމުގެ މަސައްކަތް، މި ރަމަޟާން މަސް ނިމެންވާއިރަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމް.ޓީ.ސީ.ސީ) އިން ފަށާނޭކަމަށްވެސް އެމަނިކުފާނު ވިދާޅުވިއެވެ. މިމަގު ތަރައްޤީކުރެވިގެންދާނީ، މަގުގައި ދެ ލޭން ހިމެނޭ ގޮތަށް، ޝީޓްޕައިލްކޮށް، މޫދުން ބައެއް ނަގައި، މަގު ފުޅާކޮށްގެން ކަމަށްވެސް އެމަނިކުފާނު ވިދާޅުވިއެވެ. އަދި މި އަހަރު ނިމެންވާއިރަށް މަގު ހެދުމުގެ މަސައްކަތް އެއްކޮށް ނިންމާލެވޭނޭކަމަށް އެމަނިކުފާނު ވިދާޅުވިއެވެ. ގިނަ ދުވަސްތަކެއް ވަންދެން ޢިއްޒުއްދީން ފާލަން މަރާމާތު ނުކޮށް ހުރުމުގެ ސަބަބުން، ފާލަމުގެ މައި ސްޓްރަކްޗަރ ނުވަތަ ސުޕަރ ސްޓްރަކްޗަރ އަށް ގެއްލުންވެ، ފާލަން ބޭނުންކުރާ ފަރާތްތަކަށް ގެއްލުމެއް ލިބިދާނެތީ، ފާލަމުގެ މައި ސްޓްރަކްޗަރ އަލުން ފަރުމާކޮށް، އަޕްގްރޭޑްކުރުމުގެ މަސައްކަތް އެމް.ޓީ.ސީ.ސީ އާ ހަވާލުކުރެއްވީ މީގެ އަހަރެއްހާ ދުވަސް ކުރިންނެވެ. 

Izzuddin faalan alun tharaqqy koh hulhuvaifi

ޢިއްޒުއްދީން ފާލަން އަލުން ތަރައްޤީކޮށް ހުޅުވައިފި

ސްޕްރިމް ކޯޓްގެ ތިން ފަނޑިޔާރަކު ސަސްޕެންޑްކޮށްފި

ދިވެހިރާއްޖޭގެ ސްޕްރީމް ކޯޓުގެ ބެންޗުގެ އަދަދު ފަސް މެމްބަރުންނަށް މަދުކުރާ އިސްލާހު ހިމެނޭ ބިލް ރައްޔިތުންގެ މަޖިލިހުން މިއަދު ފާސްކޮށްފިއެވެ. އެއިސްލާހުގެ ބިލް ޤާނޫނަކަށް ވާތާ ހަތް ދުވަހުގެ ތެރޭގައި ދެ ފަނޑިޔާރުން ވަކިކުރަން ލާޒމްކުރާ ގޮތަށްކޯޓުތަކާ ބެހޭ ޤާނޫނަށް ހުށަހަޅުއްވި އިސްލާހު ފާސްކުރީ 68 މެމްބަރުންގެ ވޯޓުންނެވެ. 

ބިލް ފާސްކުރަން ވޯޓްދެއްވީ ޕީއެންސީގެ މެމްބަރުންނެވެ. އެބިލްގެ ބަހުސް މަޖިލިހުގެ ތަޅުމުގައި ކޮށް, ޖުޑީޝަރީ ކޮމިޓީއަށް ފޮނުވާ ކޮމިޓީ މަރުހަލާ ނިންމީވެސް އިއްޔެއެވެ. ކޮމިޓީން ފާސްކުރީ އޮތްގޮތަށް ބަދަލެއް ނުގެނެހެވެ. މިއަދު ތަޅުމުގައި ބިލަށް ވޯޓަށް އެހީ ކޮންމެ މެމްބަރެއްގެ ކައިރީގައި ވަކިވަކިން ވޯޓަށް އަހައިގެންނެވެ. އެއީ ވޯޓިންގ ސިސްޓަމަށް މައްސަލައެއް ދިމާވެފައިވާކަމަށް ބުނެއެވެ.

ބިލް ފާސްކުރިތާ ކުޑައިރުކޮޅެއްގެ ތެރޭގައި ޖުޑީޝަލް ސަރވިސް ކޮމިޝަނުން ވަނީ ސްޕްރީމް ކޯޓްގެ ތިން ފަނޑިޔާރަކު ސަސްޕެންޑް ކޮށްފައެވެ. އެއީ ރ.އެސްމެރަލްދާ ޒާހިރު, ފަނޑިޔާރު ހުސްނުއްސުއޫދު އަދި ފަނޑިޔާރު މަހާޒު ޢަލީ އެވެ. އެތިން ފަނޑިޔާރުން ސަސްޕެންޑްކުރެއްވީ އޭސީސީން އެފަނޑިޔާރުންގެ މައްސަލައެއް ބަލަމުންދާކަމަށް ބުނެއެވެ. 

ފަމޑިޔާރުން ސަސްޕެންޑްކޮށްފައި މިވަނީ ސިޔާސީ ޕާޓީއަކުން ރައްޔިތުންގެ މަޖިލީހުގެ މެމްބަރަކު ވަކިކޮށްފިނަމަ ނުވަތަ ވަކިވެއްޖެނަމަ މެމްބަރުކަމުގެ ގޮނޑި ގެއްލޭގޮތަށް ޤާނޫނުއަސާސީއަށް ގެނައި އިސްލާހު ބާތިލް ކުރުމަށް އެދި ހުށަހެޅި މައްސަލަ ސްޕްރީމް ކޯޓްގެ ފުލް ބެންޗުން ބަލަމުން ދަނިކޮށެވެ. އަދި އެމައްސަލަ ނުނިމެނީސް އެކޯޓްގެ އެއްވެސް ފަނޑިޔާރަކާމެދު ފިޔަވަޅު އެޅުން ހުއްޓުވައިދިނުމުގެ އަމުރަކަށް އެދުމުން އެމައްސަލަ މިއަދު 1100 އަށް ތާވަލްކޮށްފައި ވަނިކޮށެވެ. މަޖިލިހުން ބިލް ފާސްކުރީ އެވަގުތުގެ ކުރިންނެވެ. 

Spreme Court fandiyaarun madhukuraa bill pass kohfi

ސްޕްރީމް ކޯޓްގެ ފަނޑިޔާރުން މަދުކުރާ ބިލް ފާސްކޮށްފި

ފަނޑިޔާރުންގެ އަދަދު މަދުކުރުމަކީ މުޅި ޖުޑިޝަރީގެ މިނިވަންކަމަށް ދޭ ހަމަލާއެއް ކަމަށް އެމްޑީޕީގެ ޗެއަރޕަސަން އަލްއުސްތާޛު ފައްޔާޒު އިސްމާއީލް ވިދާޅުވެއްޖެއެވެ. އޭނާ މިހެން ވިދާޅުވީ ސްޕްރީމް ކޯޓްގެ ފަނޑިޔާރުންގެ އަދަދު 7 ން 5 އަށް މަދުކުރަން ކޯޓްތަކުގެ ޤާނޫނަށް އިސްލާހު ހުށަހެޅުއްވުމުންނެވެ.

އެއިސްލާހު ހުށަހެޅުއްވީ ވެރިކަން ކުރާ ޕީއެންސީގެ މެމްބަރު އަބްދުއްސައްތާރު އެވެ. ހޮޅުދާ ދާއިރާގެ މެމްބަރު ހުށަހެޅުއްވި އިސްލާހުގެ ފުރަތަމަ ކިޔުން އިއްވުން މިއަދުގެ ޖަލްސާއަށް ވަނީ އެޖެންޑާކޮށްފައެވެ. ފައްޔާޒު ވިދާޅުވީ ރާއްޖޭގެ ޖުޑީޝަރީ އިސްލާހު ކުރުމަށް މިހާތަނަށް އެޅުނު އެންމެ ހަރުދަނާ ފިޔަވަޅަކީ 2019 އަދި 2020 ވަނަ އަހަރު ސުޕްރީމް ކޯޓުގެ ބެންޗަށް ގެނެވުނު ބަދަލު ކަމަށެވެ. އެއީ ފަނިޔާރުންގެ އަދަދު 7 އަށް އިތުރުކުރި ބަދަލެވެ.

ފަނޑިޔާރުންގެ އަދަދު މަދުކުރަން ކުރާ މަސައްކަތަކީ މުޅި ޖުޑީޝަރީގެ މިނިވަންކަމަށް ދޭ ހަމަލާއެއް ކަމަށް ވިދާޅުވެ ފައްޔާޒު ވަނީ ސަރުކާރުގެ އަމަލަކީ ފިނޑި އަދި ހުތުރު އަމަލެއް ކަމަށް ސިފާކުރައްވާފައެވެ. އެކަމުގައި ބައިވެރި ނުވުމަށް ރައްޔިތުންގެ މަޖިލީހުގެ މެމްބަރުންނަށް އޭނާ ވަނީ ގޮވާލައްވާފައެވެ.

 މިކަމާ ދެކޮޅަށް އިހުތިޖާޖު ކުރުމަށް މުޅި ޝަރުއީ ދާއިރާއަށް ތެދުވުމަށް ގޮވާލަން.

ފައްޔާޒު ވިދާޅުވީ މިއީ ޑިމޮކްރަސީ އާއި ޖުޑީޝަރީގެ މިނިވަންކަމުގައި ގައުމެއްގެ ގޮތުގައި ފަހަތަށް އެޅޭ ބޮޑު ފިޔަވަޅެއް ކަމަށެވެ. ސުޕްރީމް ކޯޓަށް ދުސްތޫރީ މައްސަލަ ހުށަހެޅުމާ އެކު އެ ކޯޓުގެ ފަނޑިޔާރުންނަށް ބިރު ދައްކައި، ފިޔަވަޅު އަޅައި، ވަކިކުރާނެ ކަމުގެ އިންޒާރު ދިނުމަށް ފަހު މިހާރު އެ މަސައްކަތް ކުރައްވަނީ ފަނޑިޔާރުން މަދު ކުރުމަށް ކަމަށް ފައްޔާޒު ވިދާޅުވިއެވެ. 

"މި ސަރުކާރުގެ އަމަލުތައް ހުރީ ސުޕްރީމް ކޯޓުގެ ފުރާޅުން ޓިނު ނެގުމާ ހަމައަށް ކަންކަން ގެންދިޔުމަށް." ފައްޔާޒު ވިދާޅުވިއެވެ.

Fandiyaarun ge adhadhu madhu kurumaky judiciary ge minivan kamah dhey hamalaa eh- Fayyaz 

ފަނޑިޔާރުންގެ އަދަދު މަދުކުރުމަކީ ޖުޑިޝަރީގެ މިނިވަންކަމަށް ދޭ ހަމަލާއެއް- ފައްޔާޒު

މި އަހަރުގެ ރޯދަމަހު ވެސް ފެންބިލާއި ކަރަންޓް ބިލުން ޑިސްކައުންޓް ލިބޭނެކަން ރައީސުލްޖުމްހޫރިއްޔާ ތަކުރާރު ކުރައްވައިފި އެވެ. އެމަނިކުފާނު ވަނީ މިދިޔަ އަހަރުގެ ޑިސެމްބަރު މަހު އއ. މަތިވެރިއަށް ކުރެއްވި ދަތުރުފުޅުގައި ރަމަޟާންމަހު ފެންބިލާއި ކަރަންޓް ބިލުން ޑިސްކައުންޓް ދެއްވާނެކަން އިއުލާނުކުރައްވާފައެވެ.

އެވާހަކައަށް އިޝާރާތްކުރައްވާ ރޭ ދ.ކުޑަހުވަދޫގައި ރައީސުލްޖުމްހޫރިއްޔާ ވަނީ ރޯދަމަހުގެ ކަރަންޓާއި ފެން ބިލް، އެހެން މަސްތަކަށް ވުރެ ބޮޑުނުވާނެ ގޮތަކަށް ކަންކަން އިންތިޒާމް ކުރައްވާނެ ކަމުގެ ޔަގީންކަން ދެއްވާފައވެެ. މިދިޔަ އަހަރުގެ ރަމަޟާންމަހުވެސް ސަރުކާރުން ވަނީ ފެން ބިލާއި ކަރަންޓް ބިލުން ޑިސްކައުންޓް ދީފައެވެ. 

އަޅުގަނޑު މިވާހަކަ މީގެކުރިންވެސް ވާނީ ދަންނަވާފައި. މިދިޔަ އަހަރު 8 ޑިސެމްބަރުގައި އއ. މަތިވެރީގައި ވާހަކަ ދައްކަމުން އަޅުގަނޑު ދެންނެވިން ކުރީ ރަމަޟާންމަހު ދިންގޮތަށް މި ފަހަރުވެސް ރަމަޟާންމަހުވެސް ކަރަންޓު ބިލުންނާއި ފެން ބިލުން ޑިސްކައުންޓް ދޭނަމޭ. ހަމައެކަން އެގޮތަށް ކުރިއަށްގެންދާނަން- ރައީސުލްޖުމްހޫރިއްޔާ ވިދާޅުވިއެވެ.

ކުރިއަށް އޮތް ރަމަޟާން މަހަށް ކޮންމެ ގޭބީސީ އަކަށް 48 ދަޅުގެ މަސްދަޅު ކޭހެއްވސް ސަރުކާރުން ގެންދަވަނީ ހަދިޔާ ކުރައްވަމުންނެވެ. އެއީވެސް ރައީސުލްޖުމްހޫރިއްޔާ ޑރ.މުޙައްމަދު މުއިއްޒުގެ ވައުދެކެވެ.

Roadha mahu mifaharu ves fen bill aa current bill in discount

ރޯދަމަހު މިފަހަރުވެސް ފެންބިލާއި ކަރަންޓް ބިލުން ޑިސްކައުންޓް!

ރައީސުލްޖުމްހޫރިއްޔާ ދ.އަތޮޅަށް ކުރައްވާ ދަތުރުފުޅު ކުޑަހުވަދޫން ފައްޓަވައިފިއެވެ. ދ.އަތޮޅުގެ މީހުން ދިރިއުޅޭ ހުރިހާ ރަށަކަށް މިއަދު މެންދުރުފަހު ފެއްޓެވި ތިން ދުވަހުގެ ދަތުރުފުޅުގައި އެމަނިކުފާނު އެންމެ ފުރަތަމަ ވަޑައިގެންނެވީ ވެރިކަން ކުރާ ރަށް ކުޑަހުވަދޫ އަށެވެ.

ކުޑަހުވަދޫއަށް ރައީސުލްޖުމްހޫރިއްޔާ ކުރެއްވި ދަތުރުފުޅުގެ ތެރެއިން ދ.އަތޮޅު ހޮސްޕިޓަލްގެ އާ އިމާރާތުގެ ބިންގާ ވަނީ އަޅާފައެވެ. ބިންގާ އަޅުއްވައި ދެއްވީ ލޯކަލް ކައުންސިލްތަކާއި ސިޓީތަކާބެހޭ ވަޒީރު އާދަމް ޝަރީފް އުމަރެވެ.

ރައީސުލްޖުމްހޫރިއްޔާގެ މިދަތުރުފުޅުގައި ދ.އަތޮޅުގެ ހުރިހާ ކައުންސިލްތަކާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކާއި، އެ ރަށްރަށުގެ ބައެއް މުއައްސަސާތަކުގެ އިސްވެރިންނާ ބައްދަލުކުރައްވާނެ ކަމަށް ރައީސް އޮފީހުން ވިދާޅުވިއެވެ. އަދި މި ދަތުރުފުޅުގައި ރަށްރަށުގެ ތަރައްޤީއަށްޓަކައި ކުރިއަށްގެންދިއުމަށް ނިންމަވާފައިވާ ބައެއް މަޝްރޫޢުތައް ފަށްޓަވައިދެއްވުމާއި، ނިމިފައިވާ ބައެއް މަޝްރޫޢުތައް އިފުތިތާހުކޮށްދެއްވުމަށް ހަމަޖެހިފައިވާ ކަމަށްވެސް ވިދާޅުވިއެވެ.

ރައީސުލްޖުމްހޫރިއްޔާ ދ.އަތޮޅުގެ ހުރިހާ ރަށްތަކަށް ކުރައްވާ މި ދަތުރުފުޅަކީ، އެމަނިކުފާނުގެ ވަޢުދާއި އެއްގޮތަށް ރައްޔިތުންގެ ގާތަށް ވަޑައިގެން ރައްޔިތުންގެ ހާލަތުބެއްލެވުމަށާއި މި ހިނގާ ރިޔާސީ ދައުރުގެ ތެރޭގައި ދެފަހަރު މީހުން ދިރިއުޅޭ ކޮންމެ ރަށަކަށް ޒިޔާރަތް ކުރެއްވުމަށް ވެވަޑައިގެންފައިވާ ވަޢުދާއި އެއްގޮތަށް ސިލްސިލާކޮށް ކުރިއަށްގެންދަވާ ދަތުރުފުޅެކެވެ. މިގޮތުން މި ދައުރުފުޅުތަކުގެ ތެރޭގައި މިހާތަނަށް އެމަނިކުފާނު ވަނީ އެންމެ ރަށެއްގެ ކައުންސިލް ފިޔަވައި އެހެން ހުރިހާ ރަށެއްގެ ކައުންސިލްތަކާވެސް ބައްދަލުކުރައްވައި ރަށުގެ ތަރައްޤީއާ ގުޅޭގޮތުން މަޝްވަރާކުރައްވާފައެވެ.

މި ދަތުރުފުޅުގައި ރައީސުލްޖުމްހޫރިއްޔާގެ އަރިހުގައި ބައެއް ވަޒީރުންނާއި، ސަރުކާރުގެ ބައެއް ކުންފުނިތަކުގެ ވެރިން ބައިވެރިވެވަޑައިގަންނަވައެވެ.

Raeesuljumhooriyya Dh.atholhah kuravva dhathurufulhu Kudahuvadhoo in fattavaifi

ރައީސުލްޖުމްހޫރިއްޔާ ދ.އަތޮޅަށް ކުރައްވާ ދަތުރުފުޅު ކުޑަހުވަދޫން ފައްޓަވައިފި

އިންސާފުވެރިކަމާއި، ހަމަހަމަކަމާއި، އަދާލަތު ކުރިއެރުވުމުގެ ޢަޒުމު ރައީސުލްޖުމްހޫރިއްޔާ ފާޅުކުރައްވައިފި އެވެ. އެމަނިކުފާނި މިއަޒުމް ފާޅުކުރެއްވީ ބައިނަލްއަޤުވާމީ އިޖުތިމާޢީ އަދާލަތުގެ ދުވަހުގެ މުނާސަބަތުގައި ފޮނުއްވި މެސެޖްގައެވެ.

ރައީސުލްޖުމްހޫރިއްޔާ ވިދާޅުވީ އިޖުތިމާޢީ އަދާލަތާއި ދެމެހެއްޓެނިވި ވެއްޓެއްގެ މައްޗަށް އެކުލެވިގެންދާ ދުނިޔެއެއް ޤާއިމުކުރުމަށް ކުރައްވާ މަސައްކަތުގައި ސާބިތުކަންމަތީ ދެމިހުންނެވި ކަމަށެވެ. މި އަހަރުގެ ޝިޢާރު "ސްޓްރެންތެނިން އަ ޖަސްޓް ޓްރާންޒިޝަން ފޯ އަ ސަސްޓެއިނަބަލް ފިއުޗަރ" އަށް އިޝާރާތްކުރައްވާ ވިދާޅުވީ، ދިވެހިރާއްޖެ ފަދަ ތަރައްޤީވަމުން އަންނަ، ކުޑަ، ޖަޒީރާ ޤައުމެއްގެ ޤައުމީ އަހަންމިއްޔަތުތަކާއި، ބައިނަލްއަޤުވާމީ އުންމީދުތަކާ ގުޅިލާމެހިފައިވާ ޝިޢާރެއް ކަމަށެވެ.

އިޤްތިޞާދީ ތަރައްޤީގެ ހަލުވި ފިޔަވަޅުތަކާ އެއް ހަމައެއްގައި ދެމެހެއްޓެނިވި ވެއްޓެއް ކަށަވަރުކުރުމުގައި ހުރި ގޮންޖެހުންތަކަށްވެސް މި ޝިޢާރުން އިޝާރާތްކުރާކަން އެމަނިކުފާނު ފާހަގަކުރެއްވިއެވެ.

2024 ވަނަ އަހަރުގެ ޖުލައި މަހު، ރާއްޖެއަށް ވަނީ ގްލޯބަލް ކޯލިޝަން ފޯ ސޯޝަލް ޖަސްޓިސްގެ މެންބަރުކަން ލިބިފައެވެ. ދިވެހިރާއްޖެއިން މަސައްކަތްކުރާނީ، އިޖުތިމާޢީ ވިލުންތެރިކަން އިތުރުކޮށް، ސެކްޓަރތަކުގެ މެދުގައްޔާއި ސިޔާސަތުތައް އެކުލަވާލުމުގައި އެއްބާރުލުން އިތުރުކޮށްގެންނާއި މަޝްވަރާ އިސްކޮށްގެން އެކުގައި ކުރާ މަސައްކަތުން، އިޖުތިމާޢީ އަދާލަތު ކުރިއަރުވައި ތަމަންދުން ހިއްސާކުރުމަށްކަމަށް ކަމަށް ރައީސުލްޖުމްހޫރިއްޔާ ވިދާޅުވިއެވެ.

ދިވެހިރާއްޖޭގެ ތަރައްޤީގެ މިސްރާބާއި އިޤްތިޞާދީ ކުރިއެރުމަށް އުންމީދުކުރާ އިސްލާހުތަކަށް އިޝާރާތްކުރައްވައި އެމަނިކުފާނު ވިދާޅުވީ، މި ސަރުކާރުގެ އަމާޒަކީ ހުރިހާ ރައްޔިތުންގެ ދިރިއުޅުން ފަހިކުރުމަށް މަސައްކަތްކޮށް، މޫސުމީ ބަދަލުތަކުން މި ޖަޒީރާތަކަށް ހުރި ހިރާސް ދެނެގަނެ ތިބެގެން، ރައްޔިތުންގެ ބޭނުންތައް ފުއްދައިދިނުން ކަމަށެވެ. 

ރަސްމާލެ މަޝްރޫޢު ވެގެންދާނީ ފުރަތަމަ އިކޯ- ސިޓީއަށް ކަމަށާއި، އެއީ، ގެދޮރުވެރިކަމާއި އިޤްތިޞާދީ ފުދުންތެރިކަން އިތުރުކޮށްދިނުމުގައި ދެމެހެއްޓެނިވި މިންގަނޑުތައް ގެންގުޅުމުގެ ނަމޫނާއަކަށް ވެގެންދާނޭކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.