އިޒްރާއިލްއިން ހުއްޓުމެއްނެތި މަރުގެ ވަރުގަދަ ހަމަލާތަކެއް އުތުރު ޣައްޒާއަށް ދެމުންދާތާ ދެ ހަފްތާއަށްވުރެ ގިނަދުވަސް ވަނީ އެވެ. ފާއިތުވި ދިހަ ވަރަކަށް ދުވަހުގެ ތެރޭގައި އެކަނިވެސް ޖަބާލިއާ ރެފިއުޖީ ކޭމްޕް, ކަމާލް އަދުވާން އަދި އަލް އަވްދާ ހޮސްޕިޓަލް އަށާއި ބެއިތު ލަހިޔާއަށްވަނީ ބޮމާއި މިސައިލްގެ ވަރުގަދަ ހަމަލާތަކެއް ވަނީ ދީފައެވެ. ބައެއް ހަމަލާތަކުގައި ބޮޑެތި އަލިފާންގަނޑު އުފެދި ޓެންޓްތަކުގައި ރޯވެ މީހުން ދިރިތިއްބާ އަނދަމުންދާ މަންޒަރުވެސް ވަނީ ފެނިފައެވެ.solex

އިޒްރާއިލްގެ ހަމަލާތަކުގައި އަހަރަކަށް ވުރެ ގިނަ ދުވަހު, އިންތިހާ ކެކުޅުމުގައި އުޅެމުންދާ ޣައްޒާގެ ރައްޔިތުން މިހާރުވެސް އުތުރު ޣައްޒާ ދޫކޮށް އެދަނީ އެމީހުންނަށް އެހެންތާކުން ރައްކާތެރިކަން ލިބޭނެ ކަމަށް ބަލައިގެނެއްނޫނެވެ. ނަމަވެސް އިޒްރާއިލްގެ ޕްލޭނަކީ މުޅި އުތުރުން ފަލަޞްޠީނުގެ ރައްޔިތުން ނެރެލުމެވެ. އެހެން ކަމުން ދިރިހުންނަށް ބޭނުންނަމަ އުތުރު ޣައްޒާ ދޫކޮށް ދިއުން ނޫން ގޮތެއް އެއްވެސް މީހަކަށް ނެތެވެ. ފޮޓޯތަކާއި ވީޑިއޯތަކުން ފެންނަ ގޮތުގައި ބައިބަޔަށް ސަފުސަފަށް މީހުން އަތުރާ އިޒްރާއިލްއިން ދަނީ އެމީހުން ބުނާ ގޮތަކަށް ބުނާ ތަނަކަށް ދަތުރުކުރަން އަމުރު ކުރަމުންނެވެ. އާއިލާ މީހުންނާއި ދަރިންނާއި މައިން ވަނީ ވަކިކޮށްފައެވެ. ފިރިންނާއި އަނބިން ވަނީ ވަކިކޮށް, އާއިލާތައް ވިއްސި ވިހާލި ކޮށްލާފައެވެ. ފޭލިގެތަކުގައި ތިބި މީހުން އެއްކޮށް ހުސްކޮށް އެމީހުންގެ ގައިވެސް އިޒްރާއިލްގެ ސިފައިން ވަނީ ބަލާ ފާސްކޮށްފައެވެ. ސަފުސަފުގައި އެއްބަޔަކު ކަނުބަނދެ, ދެއަތްވެސް ބަނދެފައި ތިއްބެވެ.

އދ ގެ އެޖެންސީ ފޮރ ފަލަޞްޠީނިއަން ރެފިއުޖީސް (އަންރްވާ) އިން މައުލޫމާތު ދޭ ގޮތުގައި ހަމަލާތަކާއެކު އުތުރުގައި 400,000 އެއްހާ ފަލަޞްޠީނުގެ ރައްޔިތުން ތާށިވެފައި ތިބިކަމަށް ބެލެވެއެވެ. އޭގެ ތެރޭގައި ޖަބާލިއާ ހިމެނޭ ޣައްޒާ ސިޓީވެސް ހިމެނެއެވެ.