ފްލެޓް ލިސްޓް މިމަހު ނުނެރެވޭނެ, އެކަން ވާނީ އަންނަ މަހު- ހައުސިންގ މިނިސްޓްރީ
October 28, 2024
Share this story
މިމަހުގެ ނިޔަލަށް ފެލްޓް ލިބޭ މީހުންގެ ލިސްޓް އިއުލާނުކުރެވޭނެ ކަމަށް ކުރިން ބުނެފައި އޮތަސް, އެކަން އެތާރީޚަށް ވާން ނެތް ކަމަށް ގެދޮރުވެރިކަމާ ބެހޭ ވުޒާރާއިން ބުނެފިއެވެ. އެވުޒާރާއިން މިއަދު ދެފަހަރެއްގެ މަތީން އާއްމުކުރި ބަޔާނެއްގައި ބުނީ އަންނަ މަހުގެ ދެވަނަ ހަފްތާއަށް ވަގުތީ ލިސްޓް ޢާއްމުކުރުމުގެ މަސައްކަތް ކުރަމުންދާ ކަމަށެވެ.
solex
މިނިސްޓްރީން ބުނީ ފްލެޓް ލިސްޓް ފުރިހަމަ ކުރަން އިތުރު ވަގުތު ބޭނުންވާ ކަމަށެވެ. ފްލެޓް ލިބޭ މީހުންގެ ލިސްޓް އިއުލާނުކުރެވޭނީ ނޮވެމްބަރު މަހު ކަމަށްބުނެ, މިއަދު ބަޔާން ނެރެފައި މިވަނީ އޮކްޓޯބަރު މަހުގެ ނިޔަލަށް ލިސްޓް އިއުލާނު ކުރެވޭނެ ކަމަށް ރައްޔިތުންގެ މަޖިލިހުގެ ކޮމިޓީއެއްގައި ވަޒީރު ޑރ.އަލީ ހައިދަރު ވިދާޅުވެފައި ވަނިކޮށެވެ. ރައީސުލްޖުމްހޫރިއްޔާ ޑރ.މުހައްމަދު މުއިއްޒުވެސް ވަނީ އެޔަގީންކަން ދެއްވާފައެވެ.
މިއަދު ފުރަތަމަ ޢާއްމުކުރި ބަޔާނުގައި ހައުސިންގ މިނިސްޓްރީން ބުނީ މިސަރުކާރު ހަވާލުވެ އެކުލަވާލި ހައުސިންގ އެޑްވައިޒަރީ ކޮމިޓީއާއި މާލޭ ސިޓީ ކައުންސިލްގެ ހައުސިންގ ކޮންސަލްޓަންސީ ކޮމިޓީން ވެސް ގެދޮރުވެރިޔާ ސްކީމްގެ ދާއިމީ ލިސްޓް އެކުލަވާލާފައިވާ ގޮތް ރަނގަޅު ކަމަށް ނުފެންނާތީ ރީ-އިވެލުއޭޓް ކުރުމުގެ މަސައްކަތް އަލުން މިނިސްޓްރީން ފަށާފައިވާ ކަމަށެވެ. ނަމަވެސް ފަހުން އިސްލާހުކޮށް ނެރުނު ބަޔާނުގައި ބުނީ ކޮމިޓީއަށްވެސް މައްސަލަ ހުރިކަން ފާހަގަކުރެވޭތީ ބަލަން އަދިވެސް އިތުރު ވަގުތު ބޭނުންވަނީ ކަމަށެވެ.
ނޮވެމްބަރު މަހުގެ ދެވަނަ ހަފްތާއަށްވެސް ލިސްޓް އިއުލާނުކުރެވޭނެ ކަމުގެ ޔަގީންކަން ނުދެއްވާ ވިދާޅުވީ މަސައްކަތް ކުރަމުންދާ ކަމަށެވެ. މިސަރުކާރުން އަލުން ރީއިވެލުއޭޓްކޮށް އެކުލަވާލަން އުޅެނީ މިދިޔަ ސަރުކާރުން އަޅަން ފަށާ އެކި މަރުހަލާގައިވާ 4000 ފްލެޓް ލިބޭ މީހުންގެ ލިސްޓެވެ. އެއީ މިދިޔަ ސަރުކާރު ނިމުމުގެ ކުރިން ލިސްޓް އެކުލަވާލާ, ޝަކުވާގެ މަރުހަލާވެސް ނިމި ދާއިމީ ލިސްޓް ގެޒެޓްކޮށްފައިވާ ލިސްޓެކެވެ.
