އެންޓިކޮރަޕްޝަން ކޮމިޝަން (އޭސީސީ)ގެ ޤާނޫނަށް ސަރުކާރުގެ ފަރާތުން ހުށަހަޅުއްވާފައިވަނީ އިސްލާހެއް ނޫން ކަމަށް ގަލޮޅު ދެކުނު ދާއިރާގެ މެމްބަރު މީކާއީލް އަހުމަދު ނަސީމް ވިދާޅުވެއްޖެ އެވެ. ސަރުކާރުގެ ފަރާތުން ރައްޔިތުންގެ މަޖިލިހަށް ހުށަހެޅުއްވި އެންޓިކޮރަޕްޝަން ޤާނޫނަށް އިސްލާހު ގެނައުގެ ބިލަށް ވާހަކަ ދައްކަވަމުން މީކާއީލް ވިދާޅުވީ އެއީ އިސްލާހެއް ނޫކަމަށާއި, ޑިމޮކްރެޓިކް ނިޒާމް ހަލާކުކޮށްލަން ހުށަހަޅުއްވާފައިވާ ހުށަހެޅުއްވުމެއް ކަމަށެވެ.solex

ޤާނޫނަށް ސަރުކާރުގެ ފަރާތުން ހުށަހަޅުއްވާފައިވަނީ 7 ވަނަ މާއްދާ އިސްލާހު ކުުރުމަށެވެ. އެއީ އެކޮމިޝަންގެ ރައީސްއާއި ނައިބުރައީސް އަކީ ކޮމިޝަންގެ މެމްބަރުންގެ ތެރެއިން ރައީސުލްޖުމްހޫރިއްޔާ އައްޔަންކުރައްވާ ބޭފުޅުންނަށް ހެދުމަށެވެ. ރައީސުލްޖުމްހޫރިއްޔާއަށް އެބާރު ލިބިދެނީ ރައްޔިތުންގެ މަޖިލިހަށް ހުށަހަޅުއްވައިގެން އެމަޖިލިހުގެ އަޣަލަބިއްޔަތުން ފާސްކޮށްގެން ކޮމިޝަންގެ ރައީސްއާއި ނައިބުރައީސް އައްޔަން ކުރެއްވުމަށެވެ. އިސްލާހުގައިވާ ގޮތުން ކޮމިޝަންގެ ރައީސްއާއި ނައިބުރައީސް އިސްތިއުފާ ހުށަހަޅުއްވަން ޖެހޭނީވެސް ރައީސުލްޖުމްހޫރިއްޔާ އަށެވެ.

އެއިސްލާހުތަކަށް އިޝާރާތް ކުރައްވާ މީކާއީލް ވިދާޅުވީ "އިސްލާހު' މިބަސްވެސް ހުށަހެޅިފައިވާ ބިލަށް ކިޔުން ރަނގަޅު ނޫން ކަމަށެވެ. އޭނާ ވިދާޅުވީ އިސްލާހަކީ ކުރިއަށް އެޅޭ ފިޔަވަޅު ކަމަށާއި, އަދި އެއީ ރަނގަޅަކަށް ގެނެވޭ ބަދަލެއް ކަމަށެވެ. މީކާއީލް ވިދާޅުވީ ހުށަހެޅިފައިވަނީ ތިންބާރު ވަކިވެފައިވާ ޑިމޮކްރެޓިކް ނިޒާމެއް ހަލާކުކޮށްލަން ހުށަހަޅާފައިވާ ހުށަހެޅުމެއް ކަމަށެވެ.

އޭނާ ވަނީ 90 ގެ އަހަރުތަކުގައި މަޖިލިހަށް ހުށަހެޅުނު ފަދަ ބިލްތަކެއް 20 ވަނަ މަޖިލިހަށް 2024 ވަނަ އަހަރު ހުށަހަޅުއްވާތީ ލަދުވެތިވާ ކަމަށް ވިދާޅުވެފައެވެ.

އަޅުގަނޑު ގަބޫލުކުރާ ގޮތުގައި މިއަދު މިހުށަހެޅޭ އިސްލާހަކީ ހަމައެކަނި ބިލެއް ނޫން. މިއީ ސިގްލަނެއް, އޭސީސީއަށްވެސް އަދި އެހެން މުއައްސަސާތަކަށްވެސް ރައީސް މުއިއްޒު ފޮނުއްވާ ސިގްލަނެއް. ތިމަންނާ ބޭނުންގޮތަށް ތިތަންތަނުން ތި މުއައްސަސާތަކުން އަމަލު ނުކުރާ ކަމަށް ވަންޏާ ކަނޑާލާނަމޭ.

މީކާއީލް ވިދާޅުވީ މިއީ އޭގެ ފުރަތަމަ ފިޔަވަހި ކަމަށެވެ. 2014 ން 2019 އަށް ހިނގި މަޖިލިހަށްވެސް އޭރުގެ ޕީޕީއެމް ވެރިކަމުން މިފަދަ ބޯދާ ޑިމޮކްރަސީއާ ބީރަހައްޓެހި އިސްލާހުތައް ހުށަހެޅުއްވިކަމަށް މީކާއީލް ވިދާޅުވިއެވެ.