ރައީސް ޑރ.މުހައްމަދު މުއިއްޒު މިހާރު ގެންގުޅުއްވަނީ ވެރިކަމަށް ވަޑައިގަންނަވަން ގެންގުޅުއްވި މެނިފެސްޓޯ ނޫން ކަމަށް އެމްޑީޕީގެ ޗެއަރޕަސަން ފައްޔާޒު އިސްމާއީލް ވިދާޅުވެއްޖެއެވެ. އެމްޑީޕީން ރޭ ބޭއްވި ކައުންސިލަރުންގެ ޖަލްސާގައި ފައްޔާޒު ވިދާޅުވީ މިހާރު ރައީސް މުއިއްޒު ގެންގުޅުއްވަނީ އެހެން މެނިފެސްޓޯއެއް ކަމަށެވެ.solex

ރައްޔިތުންނަށް ވވެވަޑައިގެންނެވި ވައުދުތައް ރައީސް މުއިއްޒު އުނބަށް ޖަހަމުންދާ ކަމަށް ވިދާޅުވިއެވެ. ނަމަވެސް އަދި އެމްޑީޕީން ތިބީ ކެތްތެރިކަމާ އެކުކަމަށް ވިދާޅުވިއެވެ. އެކަމަކު މިހާރު ވިރާސީ ވެރިކަމަކާ ދިމާލަށް ދާތަން ފެންނާތީ މަޑުން ތިބެވެން ނެތްކަމަށް ފައްޔާޒު ވިދާޅުވިއެވެ. ރިފަރަންޑަމްއަށް ގެންދަން ރައީސް އިއުލާނުކުރެއްވި ކަންކަމަކީ ވިރާސީއަކަށް ބަދަލުކުރުމަށް ޑރ.މުއިއްޒުގެ ނުބައި ރޭވުމެއްގެ ތެރެއިން ކުރެވޭ ކަމެއް ކަމަށްވެސް ކުރީގެ އިކޮނޮމިކް މިނިސްޓަރ ވިދާޅުވިއެވެ.

ރައްޔިތުންނަށް ދެއްކި މެނިފެސްޓޯގެ ބަދަލުގައި މުޅިން އާ މެނިފެސްޓޯއެއްގެ ވާހަކަ މިހާރު ދައްކަވަނީ. ރައްޔިތުންނަށް ވީ ވައުދުތައް ނޫން އެހެން ބައިވަރު ވައުދުތަކެއް ވާތަން ފެންނަނީ.

ޚަރަދު ކުޑަކުރުމަށް ރިޔާސީ އިންތިޚާބާ މަޖިލިސް އިންތިޚާބު އެއްކޮށްލުމުގެ ވާހަކަ ދައްކަވާ ދެއްކެވުންވެސް ފައްޔާޒު ސިފަކުރެއްވީ ޤާނޫނު އަސާސީގައި އޮތް ފާރަވެރި ދައުލަތެއްގެ ސިފަ ގެއްލުވާލަން ކުރައްވާ މަސައްކަތެއްގެ ގޮތުގައެވެ. ވިދާޅުވީ އެއީ ވަރަށް ނުރައްކާތެރި ސިގްނަލެއް ކަމަށެވެ. ވެރިކަމަށް ބަޔަކު ގެނެސްފައި އެވެރިކަން އޮބަހެއްޓުމަށްޓަކައި ރައްޔިތުންގެ މަޖިލިސް ނިންމާނެ ގޮތުގެ ރައްޔިތުންނަށް އޮންނަންވާނެ ކަމަށް ވިދާޅުވިއެވެ. މިހާރު ކުރައްވަން އުޅުއްވާ ކަމަކީ ފައިސާއާއި ބާރާއި ނުފޫޒުގެ ތެރެއިން ވެރިކަމާއި މަޖިލިސް އެއްކޮށް ނިގުޅައިގަތުމުގެ މަސައްކަތް ކަމަށް ފައްޔާޒު ވިދާޅުވިއެވެ. އެކަމަކު އޭނާ ވިދާޅުވީ ދޫކޮށްލައިގެން މަޑުން ނުތިބެވޭނެ ކަމަށެވެ.

ފައްޔާޒު ވިދާޅުވީ މިސަރުކާރަކީ ބީރު ސަރުކާރެއް ކަމަށެވެ. ސަރުކާރަށް އަޑު އިވޭނީ ވަރަށް ބާރަށް ބުނެގެން ކަމަށް ވިދާޅުވެ, މިރޭ އެމްޑީޕީން ބައްވާ އެއްވުމަށް ދިއުމަށް ގޮވާލެއްވިއެވެ.