ރައްޔިތުންގެ މަޖިލިހަށް މިއަދު ހުށަހެޅި ބިލަކީ މީޑިއާގެ މިނިވަންކަން ކަފުން ކުރުމަށް ހުށަހެޅި ބިލެއް ކަމަށާއި, އެކަމާމެދު ކަންބޮޑުވާ ކަމަށް އިދިކޮޅު އެމްޑީޕީން ބުނެފިއެވެ. އަމިއްލަ ގޮތުން މަޖިލިހަށް އިންތިޚާބުވި ތުޅާދޫ ދާއިރާގެ މެމްބަރު އަބްދުލް ހަންނާނު އަބޫބަކުރު ހުށަހެޅުއްވި މީޑިޔާ އެންޑް ބްރޯޑްކާސްޓިންގ ކޮމިޝަން އުފެއްދުމުގެ ބިލާ ގުޅިގެން އެމްޑީޕީން ނެރުނު ބަޔާނެއްގައި ބުނީ ރައީސުލްޖުމްހޫރިއްޔާގެ ފުރިހަމަ ކޮންޓްރޯލް އޮންނަ މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން އުފައްދައި އެ ކޮމިޝަނަށް ގިނަ ބާރުތަކެއް ދިނުމަށް ރައްޔިތުންގެ މަޖިލީހަށް ހުށަހަޅާފައިވާ ބިލުގައި ހިމަނާފައިވާ ކަންކަމާ މެދު ކަންބޮޑުވާ ކަމަށެވެ.solex

އެބިލްގައި ވަނީ ރާއްޖޭގެ މީޑިއާ އާއި ނޫސްވެރިކަން ރެގިއުލޭޓް ކުރުމަށް މިވަގުތު އޮތް މޯލްޑިވްސް މީޑިއާ ކައުންސިލް (އެމްއެމްސީ) އަދި މޯލްޑިވްސް ބްރޯޑްކާސްޓިން ކޮމިޝަން (އެމްއެމްސީ) އުވާލުމަށްފަހު އާ ކިމިޝަނެއް އުފެއްދެވުމަށެވެ. އެއީ މީޑިޔާ ތަކުން އިންތިޚާބުކުރާ ތިން މެމްބަރުންނާއި, މަޖިލިހުގެ ރުހުމާއެކު ރައީސް އައްޔަން ކުރައްވާ ހަތަރު މެމްބަރުން އެކުލެވޭ ކޮމިޝަނެކެވެ. އަދި ބިލްގައިވާގޮތުން ކޮމިޝަންގެ ރައީސްއާއި ނައިބުރައީސް އައްޔަން ކުރައްވަނީވެސް ރައީސުލްޖުމްހޫރިއްޔާ އެވެ.

އެމްޑީޕީން ބުނީ އެމްއެމްސީ އާއި ބްރޯޑްކޮމް އެއްކޮށްލުމަށް ސަރުކާރުގެ ވިސްނުން ހުރިކަން ބަންޑާރަ ނައިބު ހާމަކޮށްފައި ވަނިކޮށް މި ބިލު އަމިއްލަ މެމްބަރެއް ލައްވައި ރައްޔިތުންގެ މަޖިލީހަށް ހުށަހަޅާފައިވަނީ ސަރުކާރުގެ މަކަރުވެރި ރޭވުމެއްގެ ތެރެއިން ކަމަށެވެ. މިއީ މީޑިއާގެ މިނިވަންކަން ކަފުން ކުރުމަށް ސަރުކާރު އަޑީގައި އޮވެގެން މަޖިލީހަށް ވައްދާފައިވާ ބިލެއް ކަމަށް އެމްޑީޕީން ބުންޏެވެ/

ބިލްގައި އޮތީ މީޑިއާތައް އަމިއްލައަށް ރެގިއުލޭޓް ކުރުމަށް އޮތް މަގު ބަންދުވެ ސަރުކާރުގެ ނުފޫޒު މީޑިއާތަކުގެ މައްޗަށް ހައްދެއް ނެތި ހިންގުމަށް ފަހިކުރާ ފުރުސަތެއްގެ ގޮތަށް ކަމަށްވެސް އެމްޑީޕީގެ ބަޔާނުގައި ވެއެވެ. މީޑިއާތަކާއި ނޫސްވެރިން ޖޫރިމަނާ ކުރެވޭ ގޮތަށް ބިލުގައި ހިމަނާފައިވާ މާއްދަތަކަކީ ގާނޫނުއަސާސީން ކަށަވަރު ކޮށްދީފައިވާ ދުލާއި ގަލަމުގެ މިނިވަންކަމަށް ހުރަސް އަޅައި ޑިމޮކްރަސީގެ ހަތަރުވަނަ ބާރުގެ ގޮތުގައި ނޫސްވެރިންނާއި މީޑިއާތަކުން ކުރަމުންދާ މަސައްކަތްތައް ހުއްޓުވުމަށް ބިލްގައި ހިމަނާފައިވާތީވެސް އެމްޑީޕީން ވަނީ ކަންބޮޑުވުން ފާޅުކޮށްފައެވެ.

ސަރުކާރަށް ފާރަވެރިވެ ސަރުކާރު ޖަވާބުދާރީ ކުރުވުމުގެ އެންމެ އިސް ޒިންމާއެއް އަދާކުރަނީ މީޑިއާތަކުން ކަމަށްވާއިރު މީޑިއާތަކުގެ މިނިވަންކަން ގެއްލޭ ގޮތަށް ހުށަހަޅާ އެއްވެސް ގާނޫނަކަށް ދިވެހިރައްޔިތުންގެ ޑިމޮކްރަޓިކް ޕާޓީން ތާއިދުނުކުރާނެ ކަމަށް ބަޔާނުގައި ވެއެވެ. ރައްޔިތުންގެ މަޖިލީހަށް ހުށަހަޅާފައިވާ ބިލު އަނބުރާ ގެންގޮސް މީޑިއާތަކަށް ހުރަސް އެޅުމަށް ސަރުކާރުން ރާވައި ހިންގަމުންދާ އެންމެހާ ކަންކަން ހުއްޓާލުމަށްވެސް ވަނީ ގޮވާލާފައެވެ.