ލިވަޕޫލް މޮޅުވެ, ޗެމްޕިއަންސް ލީގުގެ ގަދަ 16 ޔަގީންކޮށްފިއެވެ. ޓޭބަލްގެ އެއްވަނައިގައި އޮތް ލިވަޕޫލުން ގަދަ 16 ޔަގީންކުރީ 2-1 ން ލިލް ބަލިކޮށް ހޯދި ތިން ޕޮއިންޓާއެކުއެވެ.solex

ފްރާންސްގެ ލިލް ކޮޅަށް ލިވަޕޫލްގެ ފުރަތަމަ ލަނޑު ޖަހާ ކުރި ހޯދައިދިނީ 34 ވަނަ މިނިޓްގައި މުޙައްމަދު ސަލާހު އެވެ. މިއީ އޭނާ ޔޫރަޕިއަން މުބާރާތްތަކުގައި ލިވަޕޫލަށް ޖަހައިދިން 50 ވަނަ ގޯލެވެ. 62 ވަނަ މިނިޓްގައި ޖޭ ޑޭވިޑް ލިލްއަށް ނަތީޖާ ހަމަހަމަ ކޮށްދީފައި ވަނިކޮށް, ލިވަޕޫލަށް ދެވަނަ ފަހަރަށް ކުރި ހޯދައިދިނީ 67 ވަނަ މިނިޓްގައި އެލިއޮޓް އެވެ.

ލިވަޕޫލުން ދެވަނަ ފަހަރަށް ލީޑް ހޯދުމުގެ ކުރިން 59 ވަނަ މިނިޓްގައި ލިލްގެ މަންޑީ އަށް ވަނީ ދެވަނަ ރީނދޫ ކާޑާއެކު ރަތްކާޑް ދައްކާފައެވެ. އެހެންކަމުން މެޗުގެ ބޮޑުބައެއް ލިލް އިން ކުޅެން ޖެހުނީ ދިހަ ކުޅުންތެރިންނާއެކުއެވެ.

ލިލް ބަލިވީ ހުރިހާ މުބާރާތެއް ހިމެނޭ ގޮތަށް 21 މެޗަށްފަހުއެވެ. އަނެއްކޮޅުން ލިވަޕޫލުން ގަދަ 16 އަށް ދަތުރުކުރީ ބަލިނުވެއެވެ. އެއީ 7 މެޗުންވެސް މޮޅުވެ 21 ޕޮއިންޓާއެކުއެވެ. ދެވަނައިގައި އޮތީ ރޭ ބެންފީކާ ބަލިކުރި ބާސެލޯނާ އެވެ. އެއީ 18 ޕޮއިންޓާއެކުއެވެ.

ބެންފީކާގެ މައްޗަށް ބާސެލޯނާ ކުރިހޯދީ 5-4 ނެވެ.