އާ ކުޅުންތެރިންނާއެކު ޗެލްސީ ބަލިކޮށް, ސިޓީ ގަދަ ހަތަރަކަށް
January 26, 2025
Share this story

އަލަށް ސޮއިކުރުވި ކުޅުންތެރިންނާއެކު ނިކުމެ ޗެލްސީ ބަލިކޮށް, ޗެމްޕިއަން މެންޗެސްޓަރ ސިޓީ ޕްރިމިއަރ ލީގުގެ ހަތަރު ވަނައަށް ޖެހިލައިފިއެވެ.solex
ފޯމް ދަށްވެ ގަދަ ހަތަރަކުންވެސް ބޭރުވެފައި އޮތް ސިޓީން ގަދަ ހަތަރެއްގެ ތެރެއަށް ވަނީ މެޗަށް ނިކުއިންއިރު ހަތަރެއްގައި އޮތް ޗެލްސީ 3-1 ން ބަލިކޮށްގެންނެވެ. މެޗު ސިޓީން ކާމިޔާބުކުރީ ޗެލްސީން ފުރަތަމަ ލަނޑު ޖަހާ ލީޑް ނަގާފައި ވަނިކޮށެވެ. ޗެލްސީން ވަނީ 3 ވަނަ މިނިޓްގައި ލީޑް ނަގާފައެވެ. އެއީ މަޑުއެކޭ ޖެހި ލަނޑުންނެވެ.
ހާފް ނިމެން ތިން މިނިޓަށް ވެފައި ވަނިކޮށް ސިޓީއަށް ނަތީޖާ ހަމަހަމަ ކޮށްދިނީ ޑިފެންޑަރ ގްވާޑިއޯލް އެވެ. ކުރި ހޯދައިދިނީ 68 ވަނަ މިނިޓްގައި ހާލަންޑެވެ. މިއީ ކީޕަރު އެޑާސަން ކުރިއަށް ދިން ދިގު ބޯޅައަކުން ޖެހި ލަނޑެކެވެ. ހާލަންޑް ގޯލް ޖެހީ ޗެލްސީ ކީޕަރު ރޮބާޓް ސަންޗޭޒްއަށް ހެދުނު ގޯހެއްގެ ފައިދާ ނަގައިގެންނެވެ. މިއީ ލީގުގައި މިސީޒަންގައި ހާލަންޑްގެ 18 ވަނަ ލަނޑެވެ. ތިންވަނަ ލަނޑު ޖެހީ ފޮޑެން އެވެ. 87 ވަނަ މިނިޓްގައި ފޮޑެން ލަނޑު ޖަހަން ފުރުޞަތު ތަނަވަސްކޮށްދިނީ ހާލަންޑެވެ.
މެޗަށް ސިޓީ ނިކުތީ ޓީމާ އަލަށް ގުޅުނު ދެ ކުޅުންތެރިއަކު ފުރަތަމަ އެގާރައިގަ ހިމަނައިގެންނެވެ. އެއީ ޑިފެންޑަރ ހުސަނޯވް އާއި ފޯވަޑް އޮމަރު މާމޯޝް އެވެ. ސިޓީ ކޮޅަށް ލަނޑު ވަނީ ހުސަނޯވް އަށް ހެދުނު ގޯހަކުންނެވެ. އަދި މާމޯޝް ވަނީ މެޗުގައި ގޯލެއް ޖަހާފައެވެ. ނަމަވެސް ބަލައި ނުގަތެވެ. ދެ ކުޅުންތެރިންވެސް ދެވަނަ ހާފްގައި ބަދަލުކުރިއެވެ.
މޮޅާއެކު ސިޓީ ހަތަރު ވަނައިގަ އޮތީ 23 މެޗުން 41 ޕޮއިންޓާއެކުއެވެ. ފަސްވަނައިގައި އޮތް ނިއުކާސަލް އަށްވެސް ވަނީ 41 ޕޮއިންޓް ލިބިފައެވެ. އެކަމަކު ޗެލްސީ ވަނީ ހަވަނަ އަށް ސޮއްސާލާފައެވެ. އެއްވަނައިގައި އޮތީ ރޭ އިޕްސްވިޗް ޓައުން 4-1 ން ބަލިކުރި ލިވަޕޫލެވެ. އެއީ 22 މެޗުން 53 ޕޮއިންޓާއެކުއެވެ. ދެވަނައިގައި އޮތީ ރޭ 1-0 ން ވްލުވްސް ބަލިކުރި އާސެނަލް އެވެ. ތިންވަނައިގައި އޮތީ ނޮޓިންގހަމް ފޮރެސްޓެވެ.