ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާއަށް ދޭ އެވޯޑް 'ބެލޮންޑިއޯ" ސްޕެއިންއާއި މެންޗެސްޓަރ ސިޓީގެ މިޑްފީލްޑަރ ރޮޑްރީ އަށް ދީފިއެވެ. ފަހުވަގުތާ ހަމައަށްވެސް އެވޯޑް އުފުލާލާނެ ކަމަށް ބެލެވުނު ވިނީޝިއުސް ޖޫނިއަރ އަށް ލިބުނީ ދެވަނަ އެވެ. ތިންވަނަ އަށް ދިޔައީ ވިނީޝިއުސްއާއެކު ރެއާލް މެޑްރިޑަށް ކުޅޭ އިނގިރޭސި މިޑްފީލްޑަރ ބެލިންގހަމް އަށެވެ.solex

ވިނީޝިއުސްއަށް އެވޯޑް ނުލިބޭކަމަށް އިއްޔެ ލިބުނު ޔަގީން ޚަބަރުތަކާއެކު ރެއާލް މެޑްރިޑުން ވަނީ އެވޯޑް ހަފްލާ ބޮއިކޮޓްކޮށްފައެވެ. އެންމެ މޮޅު ކޯޗުގެ އެވޯޑް ލިބުނު ރެއާލްގެ ކާލޯ އެންޗެލޮޓީ އާއި އެންމެ މޮޅު ކްލަބްގެ އެވޯޑް ލިބުނު ރެއާލް މެޑްރިޑާއި, ގާޑް މުލާ އެވޯޑް ހިއްސާކުރި އެމްބާޕޭ ވެސް އެވޯޑް ބަލާ ހަފްލާއަށް ނުދެއެވެ. އެވޯޑް ހަފްލާ އޮތީ ފްރާންސްގެ ޕެރިހުގައެވެ.

އެވޯޑް ލިބުނު އިރު ރޮޑްރީ މިވަގުތު ހުރީ އަނިޔާގައެވެ. ކަކުލުގެ އޮޕަރޭޝަނެއްކޮށް ފަރުވާ ހޯދަމުންދާތީ އޭނާ އެވޯޑާ ހަވާލުވާން ސްޓޭޖަށް އެރީ ކްރައުޗްގައެވެ. މިސީޒަން އަނިޔާގެ ސަބަބުން ގެއްލުނަސް މިދިޔަ ސީޒަންގައި ރޮޑްރީއަށް ގެއްލުނީ ޖުމްލަ އެންމެ މެޗެކެވެ.

ރޮޑްރީ ވެފައިވަނީ މެންޗެސްޓަރ ސިޓީގެ ތާރީޚުގައި ބެލޮޑިއޯ އުފުލާލި އެކްލަބްގެ ފުރަތަމަ ކުޅުންތެރިޔާ އަށެވެ. މެންޗެސްޓަރ ސިޓީއާއެކު ރޮޑްރީ ވަނީ މިދިޔަ ސީޒަންގައި ޕްރިމިއަރ ލީގާއި, ޔުއެފާ ސުޕަރ ކަޕާއި, ކްލަބް ވަރލްޑް ކަޕް އުފުލާލަފައެވެ. މިއަހަރު ސްޕެއިންއާއެކު ޔޫރޯވެސް އުފުލާލި އެވެ.

ރޮޑްރީއަކީ މިހާރު ކްލަބާއި ގައުމީ ޓީމްގައިވެސް އެންމެ ނުފޫޒުގަދަ މިޑްފީލްޑަރެވެ. ކުޅިވަރު ނޫސްވެރިންގެ ވޯޓާއި, ގައުމީ ޓީމްތަކުގެ ކޯޗުންނާއި ކެޕްޓަނުންގެ ވޯޓްވެސް ހިމެނިގެން, ފަނޑިޔާރުންގެ މާރކްސް އާއެކު ހޮވާ މިއެވޯޑްގެ ތާރީޚުގައި މިއީ 2003 ވަނަ އަހަރުގެ ފަހުން ރޮނާލްޑޯއާއި މެސީ ނޮމިނޭޝަންސްގައި ނެތި ދިން ފުރަތަމަ އެވޯޑެވެ.

ބެލޮންޑިއޯ ފެމިނިން އެވޯޑް އުފުލާލީ ބާސެލޯނާގެ ބޮންމާޓީ އެވެ. މިއީ ވިދިވިދިގެން އޭނާ އެވޯޑް ހޯދި ދެވަނަ ފަހަރެވެ. ބާސެލޯނާގެ ޔަމާލް ވަނީ 21 އަހަރުން ދަށުގެ އެންމެ މޮޅު ކުޅުންތެރިޔާއަށް ދޭ ކޮޕާ ޓްރޮފީ އުފުލާލާފައެވެ. އަދި އެންމެ ގިނަ ލަނޑު ޖަހާ ކުޅުންތެރިޔާއަށްދޭ ގާޑް މުލާ ޓްރޮފީ ހޯދީ ބަޔާން މިއުނިކަށް ކުޅެމުން އަންނަ އިންގްލެންޑް ކެޕްޓަން ހެރީ ކޭން އާއި ފްރާންސް ކެޕްޓަން އެމްބާޕޭ އެވެ. ދެ ކުޅުންތެރިންވެސް މިދިޔަ ސީޒަންގައި 44 ލަނޑު ޖެހިއެވެ. އެކަމަކު އެވޯޑާ ހަވާލުވާން ދިޔައީ ހެރީ ކޭން އެކަންޏެވެ.