ބޮޓްސްވާނާ އިންޓަރނޭޝަނަލް މުބާރާތުން ރާއްޖޭގެ ރިވައިވަލް ސްޕޯރޓްސް ކްލަބް ފަސް މެޑަލް ހޯދައިފިއެވެ.solex

ފަސް މެޑަލްގެ ތެރޭގައި އެއް ރަން މެޑަލް ހިމެނެއެވެ. ރަން މެޑަލް ހޯދީ އަންހެން ސިންގަލްސް އިވެންޓްގައި ފާތިމަތު ނަބާހާ އެވެ. ނަބާ ރަން މެޑަލް ހޯދީ ފައިނަލްގައި ދައްތަ އާމިނަތު ނަބީހާ ބަލިކޮށްގެންނެވެ. މިކެޓަގަރީގެ ފައިނަލަށް ނިކުއިންއިރުވެސް ރަން އަދި ރިހި މެޑަލް އޮތީ ރާއްޖެއަށް ޔަގީންވެފައެވެ.

މުބާރާތުގައި ރާއްޖެއިން ދެން މެޑަލް ހޯދީ މިކްސް ޑަބަލްސްއާއި އަންހެން އަދި ފިރިހެން ޑަބަލްސްގައެވެ. މިކްސްޑަބަލްސްގައި ޒަޔާން ޒަކީ އާއި ފާތިމަތު ނަބާހާ ވަނީ ރިހި މެޑަލް ހޯދާފައެވެ. ފިރިހެން ޑަބަލްސްގައި ޒަޔާން އާއި ނިބާލް އަހުމަދު ލޯ މެޑަލް ހޯދި އެވެ. އަންހެން ޑަބަލްސްގައި ނަބާއާއި ނަބީވެސް ވަނީ ލޯ މެޑަލް ހޯދާފައެވެ.

މިކާމިޔާބީތައް ފާހަގަކުރައްވާ ރައީސުލްޖުމްހޫރިއްޔާ ޑރ.މުހައްމަދު މުއިއްޒު ކުރެއްވި ޕޯސްޓެއްގައި ވިދާޅުވީ މި ޝަރަފް ރާއްޖެއަށް ހޯދައިދިން ހުނަރުވެރި ދެބެއިންނަށާއި، ދިވެހި މުޅި ޓީމަށް ތަހުނިޔާ ދަންނަވާ ކަމަށެވެ.

ރައީސުލްޖުމްހޫރިއްޔާގެ މެސެޖްގައި ވަނީ ބޮޓސްވާނާ މުބާރާތުގެ ކުރިން އެކުޅުންތެރިން ވާދަކުރި ޒެމްބިއާ އިންޓަރނޭޝަނަލް މުބާރާތުގެ ކާމިޔާބީވެސް ފާހަގަކުރައްވާފައެވެ. އެމުބާރާތުން ތިން މެޑަލް ރިވައިވަލް ސްޕޯރޓްސް އިން ހޯދިއެވެ. އެ މުބާރާތުގައި އަންހެން ޑަބަލްސްއިން ނަބާހާއާއި ނަބީހާގެ ޕެއަރ ރަން މެޑަލް ހޯދިއެވެ. ސިންގަލްސްގައި ނަބާ ލޯ މެޑަލް ހޯދިއެވެ. މިކްސް ޑަބަލްސްގައި ޒަޔާންއާއެކު ވެސް ނަބާ ލޯ މެޑަލް ހޯދިއެވެ.