އަޒަރުބައިޖާންގެ މަތިންދާ ބޯޓެއް ރަޝިއާގެ ވައިގެ ސަރަޙައްދަށް ވެއްޓި ހިނގި ހާދިސާ އާ ގުޅިގެން ރަޝިއާގެ ރައީސް ލަޑިމިއަރ ޕުޓިން މާފަށް އެދިއްޖެއެވެ. އަޒަރުބައިޖާންގެ ރައީސް އިލްހާމް އަލިޔެވް އަށް ފޯނުން ގުޅުއްވާ ޕުޓިން ވަނީ ހިނގައިގެން ދިޔައީ ވަރަށް ހިތާމަވެރި ހާދިސާއެއް ކަމަށާއި އެކަމާ ގުޅިގެން މަޢާފަށް އެދޭކަމަށް ވިދާޅުވެފައެވެ. ޕުޓިން ވަނީ ހާދިސާގައި ފުރާނަ ގެއްލުނު ފަރާތްތަކުގެ އާއިލާތަކަށް ތައުޒިޔާވެސް ފޮނުވާފައެވެ. އަދި ޒަޙަމްވި ފަރާތްތަކަށް އަވަސް ޝިފާއަކަށް އެދޭކަމަށްވެސް ކްރެއިމްލިންގެ ބަޔާނުގައި ވެއެވެ.solex

މިދިޔަ ހަފުތާގެ ބުދަ ދުވަހު އަޒަރުބައިޖާންގެ ވެރިރަށް ބަކޫއިން ފުރައިގެން ރަޝިއާގެ ގްރޮޒްނީއަށް ދަތުރުކުރި ބޯޓު ވެއްޓިފައިވަނީ ކަޒަކްސްތާނުގެ ކެސްޕިއަން ސީގެ އައްސޭރި ފަށުގެ ސަރަޙައްދަކަށެވެ. މިހާދިސާގައި ބޯޓުން ދަތުރުކުރި 67 މީހުންގެ ތެރެއިން 38 މީހަކު ވަނީ މަރުވެފައެވެ.

އަޒަރުބައިޖާންގެ އިބްތިދާއީ ތަޙްޤީގަށް ހާމަވެފައިވާ ގޮތުގައި ބޯޓު ވެއްޓެން ދިމާވި ހާދިސާ ހިނގާފައިވަނީ ރަޝިއާގެ އެއަރ ޑިފެންސް ސިސްޓަމްއިން ޔޫކްރެއިންއަށް އަމާޒުކޮށް ދިން ހަމަލާއެއް ބޯޓަށް އެރުމުގެ ސަބަބުން ކަމުގައި ރޮއިޓާސް އިން ރިޕޯޓްކޮށްފައި ވެއެވެ.

މިކަމާ ގުޅިގެން ރައީސް ޕުޓިންގެ ފަރާތުންވަނީ މާފަށްއެދި ސްޓޭޓްމަންޓެއްވެސް ނެރެފައެވެ. މިގޮތަށް އާންމުކޮށް މާފަށް އެދުމަކީ ވަރަށް މަދު ޙާލަތެއްގައި ނޫނީ ޕުޓިން ކުރެއްވި ކަމެއްނޫނެވެ. މިއީ މިފަދަ ކަމެއްގެ ޒިންމާ ރަޝިއާއިން ނެގުމާ ގާތަށްވެސް އަމަލުކުރެއްވި ފުރަތަމަ ފަހަރުވެސް މެއެވެ. ނަމަވެސް ޕުޓިންގެ ބަޔާން އަދި ފޯން ކޯލުގައިވެސް ބޯޓު ވެއްޓިފައިވަނީ ރަޝިއާގެ ސަބަބުން ކަމުގައި ބަޔާންކޮށްފައެއް ނުވެއެވެ. ނަމަވެސް ބަޔާނުގައި އެ ހާދިސާ އާ ގުޅިގެން ޖިނާއީ ތަޙްގީގެއް ކުރަމުންދާ ކަމަށް ވަނީ ބުނެފައެވެ.

"އެވަގުތު ގްރޯޒްނީ, މޮޒްޑޮކް އަދި ލަޑިކަވްކަޒް އަށް ދިޔައީ ޔޫކްރެއިން އިން މީހުންނެތް ވައިގެ އުޅަނދުތަކުން ހަމަލާދެމުން. ރަޝިއާގެ އެއަރ ޑިފެންސް ސިސްޓަމުން ދިޔައީ ހަމަލާތައް ހުއްޓުވުމަށް މަސައްކަތް ކުރަމުން" ބަޔާނުގައިވެއެވެ.