ކުޅުންތެރިއަކު މަދުކޮށް ކުޅެ, ބާސެލޯނާއިން ސްޕެނިޝް ސުޕަރ ކަޕް ކާމިޔާބުކޮށްފި އެވެ.solex

މުބާރާތުގެ އެންމެ ކާމިޔާބު ޓީމް ބާސެލޯނާއިން ޗެމްޕިއަން ރެއާލް މެޑްރިޑާ ދެކޮޅަށް ނިކުމެ, ތަށި ހޯދީ ރެއާލް އިން ފުރަތަމަ ލަނޑު ޖަހާ ކުރި ހޯދާފައިވަނިކޮށެވެ. މެޗު ފަށައިގެން ފަސްވަނަ މިނިޓްގައި ވިނީޝިއުސް ޖޫނިއަރ ތަނަވަސްކޮށްދިން ފުރުޞަތަކުން އެމްބާޕޭ ރެއާލް އަށް ލީޑް ނަގައިދިނެވެ. 22 ވަނަ މިނިޓްގައި ބާސާއަށް ނަތީޖާ ހަމަހަމަ ކޮށްދިނީ ޔަމާލް އެވެ. އެއީ ލެވަންޑޯސްކީ ތަނަވަސްކޮށްދިން ފުރުޞަތަކުންނެވެ. 36 ވަނަ މިނިޓްގައި ޕެނަލްޓީއަކުން ބާސާއަށް ލީޑް ނަގައިދިނީ ލެވަންޑޯސްކީ އެވެ.

ބާސެލޯނާގެ ތިންވަނަ ލަނޑު ޖެހީ ރަފީނިޔާއެވެ. ފުރަތަމަ ހާފްގެ އިތުރު ވަގުތުގައި ހަތަރު ވަނަ ލަނޑު ޖެހީ އަލްހަންދްރޯ ބަލްޑޭ އެވެ. ދެވަނަ ހާފް ފަށައިގެން ތިންވަނަ މިނިޓްގައި ބާސާގެ ފަސްވަނަ ލަނޑު ޖެހީ ރަފީނިއާއެވެ. ރެއާލްއަށް ދެވަނަ ލަނޑެއް ޖެހުނީ ބާސާއިން ފަސް ލަނޑު ޖެހިފަހުންނެވެ. ދެވަނަ ލަނޑު ޖެހީ ރޮޑްރީގޯ އެވެ. އޭރު ބާސާއިން ކުޅެމުން ދިޔައީ ކީޕަރު ޝެޒްނީ އަށް ރަތްކާޑް ދެއްކުމުން ކުޅުންތެރިއަކު މަދުކޮށެވެ. އެމްބާޕޭ އަށް ކުރި ފައުލަށް 56 ވަނަ މިނިޓްގައި ކީޕަރަށް ރަތްކާޑް ދެއްކުމުން ބާސެލޯނާއިން ދެވަނަ ހާފްގެ ބޮޑުބައި ކުޅުނީ ކުޅުންތެރިއަކު މަދުކޮށެވެ. އެހެންނަމަވެސް ރެއާލް އަށް ބާސާގެ މައްޗަށް ކުރިއެއް ނުހޯދުނެވެ.

މިއީ މިމުބާރާތް ބާސެލޯނާއިން ހޯދި 15 ވަނަ ފަހަރެވެ. ރެއާލް އަށް މިމުބާރާތް ކާމިޔާބުކުރެވިފައި ވަނީ 13 ފަހަރެވެ.